نجع عشاق الشاعر الليبي علي الكيلاني

نجع محبي الشاعر الكبير علي الكيلاني


    *** ياطرابلس كنتي عرين اصيود ***

    شاطر

    عواشه النجع

    عدد المساهمات : 31
    تاريخ التسجيل : 27/03/2010
    الموقع : نجع هلي

    *** ياطرابلس كنتي عرين اصيود ***

    مُساهمة  عواشه النجع في السبت يناير 04, 2014 8:39 am

    • ياطرابلس كنتي عرين اصيود
    • قوليلهم ريت الزمان يعود

    • لطرابلس وصلنا
    • النهر العظيم عظيم كان عملنا
    • وكيف ماوعدنا بالتحدي وصلنا
    • واللي بيجحد مايفيد جحود
    • وقلنا لهلها (بالشفاء ياهلنا)
    • هديه رضيه من زعيم ودود
    • عروس البحر والنهر عنها قلنا
    • وكل من مفارقها لها مشدود
    • وكيف ماتمنى ثوبها فصلنا
    • عروس وعليها العاشقين حشود
    • واحنا طرابلس في حبها مازلنا
    • هي معاهده واحنا اصحاب عهود
    • لانبدلوها لاتريد بدلنا
    • في قلوبنا حتي وراء الحدود
    • ولولا الناتو من اللي يرحلنا
    • وكانه مشي يوم( الاثنين) نعود
    • عطشت بعدنا عطشها زعلنا
    • وكل حر من تعطيشها مكمود
    • واحنا طرابلس عنها القواعد شلنا
    • (ويلس) رحل منها بلا بارود
    • بيها احتفلنا والانوار شعلنا
    • وكل حفل ننقل فيه في (القنفود)
    • ياطرابلس كنتي عرين اصيود

    • ماهيش( لبرنار)
    • ولاللي وراء برنار داروا العار
    • عاطي احداثيات للطيار
    • يهودي وجده فليبيا مولود
    • والقصد واضح مايبي فسار
    • غير فيه من بيفتنوا مقصود
    • طرابلس لهلها الصامده لحرار
    • تحية اكبار وساجدين سجود
    • من الزاويه لاعند قصر خيار
    • لاعند ترهونه ورد ردود
    • ومن شطها من شارع المختار
    • حتي العزيزيه الكرم والجود
    • اللي استقبلوا القائد بكل افخار
    • بالخيل والشرطان في القنفود
    • قوليلهم ريت الزمان يعود

    • ياطرابلس شن صاير
    • الفاتح رواك وعطشك فبراير
    • زيدان في لفة مضخه حاير
    • عطلت اللي كانت تضخ صعود
    • ظنك عليها شن يقول الزاير
    • لاظي لا اميه ايامه سود
    • واللي عطش يسمع شريط (بشاير)
    • ياليبيا موجود في القنفود
    • ياطرابلس كنتي عرين اصيود

    • ياطرابلس ماخلوا
    • كل شي فيك جميل منك قلوا
    • صلي تيمم كان جوا بيصلوا
    • تغدي وتعشي وافطري الوعود
    • فطاحل الماء ولامن منك جلوا
    • في السجن من (بوزيد لا القعود)
    • بلي معاهم واعجني كان بلوا
    • علي صوره الخزان في القنفود
    • قوليلهم ريت الزمان يعود

    • طوفوا علي الخزان
    • الفارغ ونادوا كل من عطشان
    • يبسق علي زومه اللي خيان
    • الكذاب من رحمه الله مطرود
    • ليام المتغطي بهن عريان
    • دير نهر ماري وماتكون حسود
    • واللي بلاه الله بالنسيان
    • يعرض شريط النهر في القنفود
    • ياطرابلس كنتي عرين اصيود

    • ياطرابلس شن صار
    • بديتي سجون ومعتقل لحرار
    • سجن عاليمين وسجن عاليسار
    • يحبس( شلابي) كان ساب (عنود)
    • بديتي اعقيله غير لستعمار
    • احداش لوله طليان مش يهود
    • واللي يقول ماجلاه بومنيار
    • لفلام موجوده قدا القنفود
    • قوليلهم ريت الزمان يعود

    • ياطرابلس قوليها
    • غصه فقلبك للزمان احكيها
    • ايامك ايام العز كيف عشتيها
    • افريقيا بفضلك قايده وتقود
    • قمه بعد قمه العظمي تجيها
    • ياجايه ياماشيه الوفود
    • واللي بينكرها وبي يخفيها
    • عيدوا شريط القمم في القنفود
    • ياطرابلس كنتي عرين اصيود

    • انحييك في الختام
    • ونقولك مابينا ليام
    • كيف ماعرفتينا اقوا لعزام
    • وليا طاح بيت امك تقل عمود
    • واللي نشوفه نحمله السلام
    • وعشمنا فربي والامل موجود
    • ماتسمعي تشويش في لعلام
    • ثلاثين محطه مايجن قنفود
    • ياطرابلس كنتي عرين اصيود
    • قوليلهم ريت الزمان يعود


    ملاحظه
    • بالشفاء ياهلنا [نشيد عن النهر]
    • الاثنين [ليلة الفاتح]
    • القنفود[اذاعه الجماهيريه]
    • ويلس [ قاعدة معيتيقه]
    • برنار [اليهودي برنار ليفي]
    • بشاير [نسيد للفنان المرحوم محمد خليل]
    • بوزيد[ الاستاذ ابو زيد دورده فك الله اسره]
    • القعود[المهندس عبد المجيد القعود فك الله اسره]
    • شلابي[ الاستاذه فوزيه شلابي فك الله اسرها]
    • عنود[عنود السنوسي المحرره]

      الوقت/التاريخ الآن هو الجمعة نوفمبر 24, 2017 3:47 am